പെരുന്നാൾ ബിരിയാണിയുടെ ഓർമ്മകൾ

നാട്ടിൽ നിന്ന് മാറി നിൽക്കാൻ തുടങ്ങിയപ്പോൾ മുതൽ ഏറ്റവും കൂടുതൽ മിസ് ചെയ്യുന്ന ഒരേയൊരു സംഗതി എല്ലാ പെരുന്നാളിനും വീട്ടിൽ എത്തിയിരുന്ന ആ ബിരിയാണി പാത്രം ആണ്.

ഞങ്ങൾ വീട്ടിൽ ഉണ്ടോ ഇല്ലയോ, ആരൊക്കെ കഴിക്കും കഴിക്കില്ല എന്നതൊക്കെ പിന്നെയുള്ള കാര്യം. ആദ്യം രണ്ട് വഴിക്ക് നിന്നും വ്യത്യസ്തങ്ങളായ രണ്ട് വലിയ പാത്രം ബിരിയാണി വീട്ടിൽ എത്തിയിരിക്കും.

ചോറും, ഊണും, സദ്യയുമൊക്കെ വീട്ടിലെയും ഒരുവിധം എല്ലാ വിവാഹങ്ങളുടെയും ഭക്ഷണ രീതിയായതുകൊണ്ട് തന്നെ ഓണം എന്നെ സംബന്ധിച്ച് അത്ര വലിയ സംഭവം ആയിരുന്നില്ല — അപ്പോഴും ഇപ്പോഴും.

അധികം ക്രിസ്ത്യൻ മതസ്ഥരായ സുഹൃത്തുക്കൾ പണ്ട് ഇല്ലാതിരുന്നതുകൊണ്ട് ക്രിസ്മസ് പോലും അങ്ങനെ വലിയ സംഗതി ആയി ഫീൽ ചെയ്തിട്ടില്ല. പക്ഷേ ഓർമ്മവച്ച കാലം മുതൽ പെരുന്നാൾ ബിരിയാണി വീട്ടിലെ ക്ഷണിക്കപ്പെടാത്ത അതിഥിയായിരുന്നു.

ഇന്നിപ്പോൾ ഇഷ്ടമുള്ള സമയത്ത് ഇഷ്ടപ്പെട്ട ഹോട്ടലിൽ കയറി വിവിധ തരത്തിലുള്ള ബിരിയാണികൾ വാങ്ങി കഴിക്കാനുള്ള കപ്പാസിറ്റിയും സാഹചര്യങ്ങളും ഉണ്ടെങ്കിലും...

ഓരോ പെരുന്നാൾ വരുമ്പോഴും വീട്ടിലേക്ക് വന്നിരുന്ന ആ പ്രതീക്ഷയുള്ള അപ്രതീക്ഷിതമായ ബിരിയാണി തന്നിരുന്ന ആ ഫീൽ വേറെ എങ്ങും കിട്ടില്ല.